Italia, mbështetje të plotë qeverisë shqiptare dhe Shqipërisë për hapat e mëtejshme për integrim në Bashkimin Europian

Kryeministri Berisha priti sot Drejtorin e Drejtorisë së Përgjithshme për Europën në Ministrinë e Punëve të Jashtme të Italisë, ambasadorin Mario Bova, i cili shoqërohej nga ambasadori italian në Tiranë, Saba D’Elia.

Pasi e falënderoi për mikpritjen, ambasadori Bova i transmetoi Kryeministrit Berisha përshëndetjet më të përzemërta nga Kryeministri Berluskoni dhe të shumë miqve të tjerë të Shqipërisë në qeverinë dhe institucionet italiane.

Kryeministri Berisha, pasi i uroi mirëseardhjen, i shprehu mirënjohjen e thellë për ndihmën dhe mbështetjen e vazhdueshme që Italia fqinje dhe  mike i ka dhënë Shqipërisë gjatë gjithë kësaj periudhe.

Ambasadori Bova vlerësoi ndryshimet e jashtëzakonshme që kanë ndodhur në Shqipëri vitet e fundit dhe e uroi Kryeministrin Berisha për arritjet madhore si përsa i përket pranimit të kërkesës së Shqipërisë për statusin e vendit kandidat në BE, realizimin e veprave të mëdha infrastrukturore, si edhe të reformave të tjera që po e shndërrojnë çdo ditë e më shumë Shqipërinë dhe imazhin e saj në botë.

Në takim, u diskutua nisma e fundit e të dy qeverive për përgatitjen e partneritetit strategjik midis Republikës së Shqipërisë dhe Republikës së Italisë, i cili parashikon ngritjen në një stad të ri edhe më të lartë e më të konsoliduar të marrëdhënieve të ngushta e të shkëlqyera midis dy vendeve dhe dy qeverive dhe bashkëpunimit shumë dimensional midis dy vendeve.

Partneriteti strategjik, i cili pritet të lançohet nga dy kryeministrat Berisha dhe Berluskoni në fillim të vitit 2010, përfshin organizimin e samiteve të niveleve më të larta politike në mënyrë të përhershme e periodike, forumeve ekonomike, eventeve kulturore dhe artistike, të mbështetura nga një kuadër edhe më i gjerë dhe i sofistikuar ligjor dhe institucional, i cili do t’i shërbejë forcimit të mëtejshëm të miqësisë dhe lidhjeve të ngushta ndërmjet dy vendeve dhe popujve tanë, si dhe do të  zgjerojë dhe thellojë bashkëpunimin dypalësh ekonomik, tregtar, në fushën e turizmit, mbrojtjes së mjedisit, kulturës, në fushën e mbrojtjes etj., në të mirë të progresit, zhvillimit të mëtejshëm ekonomik dhe prosperitetit të të dy vendeve, si dhe do të japë një kontribut shtesë në përshpejtimin e hapave të mëtejshëm të integrimit të Shqipërisë në Bashkimin Europian. Gjithashtu, partneriteti strategjik merr parasysh angazhimin e të dy vendeve për të intensifikuar kontributin e tyre në të gjitha nismat me karakter rajonal.

Në këtë kontekst, Kryeministri Berisha shprehu mirënjohjen për mbështetjen e jashtëzakonshme që Italia i ka dhënë në vazhdimësi përpjekjeve të Shqipërisë për integrim sa më të shpejtë në BE, duke theksuar se vendi fqinj dhe mik, Italia dhe qeveria italiane janë dëshmuar avokatët më të shkëlqyer të aspiratës së shqiptarëve për rikthim të shpejtë në familjen europiane.

Në takim u shpreh edhe një herë interesi i madh i të dy vendeve për projektin e rëndësishëm infrastrukturor të Korridorit 8-të, i cili do të sillte një kontribut të ri në zhvillimin ekonomik, në rritjen e shkëmbimeve tregtare e të gjithanshme ndërmjet vendeve të rajonit, si dhe do të forconte miqësinë dhe bashkëpunimin ndërmjet popujve të këtyre vendeve.