Përshëndetje,
që nga takimi i fundit, në Shqipëri kanë ndodhur ngjarje të mëdha e shumë të mëdha: është zgjedhur Presidenti i ri i Republikës; janë rritur rrogat e pensionet e qytetarëve; në vazhdim të marrëveshjes së nëntorit të vitit të kaluar është dorëzuar projekti i adresimit të rekomandimeve të OSBE/ODIHR-it për reformën elektorale; kanë kaluar një seri vendimesh me impakt shumë të rëndësishëm. Nuk kam mundur të gjendem para jush, me gjithë dëshirën që kam pasur. Duhet ta dini se ndonjëherë më ndodh që heshtja më pushton, më urdhëron e më thotë ‘do flas unë, mos fol ti’. Ndaj jam sot, para jush, jo për ndonjë deklaratë, por i hapur për çdo pyetje e çështje që ju dëshironi të më adresoni.
Përshëndetje zoti Kryeministër. Duke iu referuar pretendimeve të ngritura nga Partia Socialiste, përsa i takon hetimit parlamentar ndaj ministrit të Mbrojtjes Imami dhe Ministrisë së Mbrojtjes për çështjen e një trafiku të armëve. Pyetja ime është e drejtpërdrejtë. A ka pasur trafik të armëve dhe përgjime për opozitën e diplomatët e huaj, siç pretendon opozita?
Kryeministri Berisha: Së pari, dua t’ju garantoj që kjo mazhorancë nuk pengon e nuk mund të pengojë as edhe një nismë të vetme të parlamentit. Ju e dini mirë që parlamenti ka rregulloren e ligjin, bazuar në nenin 77 të Kushtetutës, mbi të cilin ndërmerr veprimet. Shqiptarët duhet ta dinë se deri në këtë moment, në kryesinë e parlamentit, në protokollin e parlamentit nuk është dorëzuar qoftë një kërkesë e vetme, nga deputetët e opozitës, për komision hetimor parlamentar. Ligji i komisioneve hetimore parlamentare, një ligj konsensual në kohën e tij, është i qartë si kristali. Por këtyre zotërinjve nuk u intereson hetimi, por teatraliteti. Atyre u intereson të përpiqen të nxijnë e damkosin një institucion nga më të respektuarit për Shqipërinë e shqiptarët. Atyre nuk u intereson që të sjellin projektin e komisionit hetimor parlament dhe që nuk mund të ketë mëdyshje, por u intereson të akuzojnë e të shpifin pa baza, se po bëhet trafik armësh. Ju garantoj ju dhe të gjithë shqiptarët se në mënyrë kategorike, absolute, nuk ekziston qoftë edhe një fishek i trafikuar nga ky vend. Procedurat e eksportit të armëve, në përputhje me ligjet e vendit dhe ato ndërkombëtare, janë plotësisht transparente. Pra, këta zotërinj kërkojnë teatralitet para mediave. A mund t’u shtroni pyetjen: kush i pengoi të paraqesin kërkesë për komision hetimor parlamentar dhe përse nuk e paraqitën? Kontrolli parlamentar, kontrolli administrativ, kontrolli i shtetit, që të gjitha kanë procedurën e tyre ligjore dhe asgjë nuk mund të bëhet jashtë tyre. Ata e dinë që nuk ka trafik, por nuk u intereson kjo, u intereson shpifja. Ata e dinë që nuk ekziston në mënyrë kategorike, absolute, asnjë praktikë e tillë, por kjo nuk ka rëndësi për ta. Rëndësi ka që, meqenëse Shqipëria, në përputhje me ligjet e vendit e ato ndërkombëtare, ka eksporte minimale, për hir të vërtetës, të fishekëve a gëzhojave a ç’mund të jenë, kjo veprimtari duhet të nxihet si veprimtari trafiku.
Përsa i përket regjistrimit, duhet të them se ky është një sindrom i tmerrshëm obsesiv i Edi Ramës, i cili çdo mëngjes, kur shkon në zyrë, kthen përmbys kolltukët. A mund të udhëhiqet një parti nga obsesione të tilla?! Ushtria shqiptare ka zbatuar e zbaton rregulla të plota si institucion i depolitizuar. Ushtria shqiptare ka pasur, ka e do të ketë të gjitha mjetet që asaj i duhen për të përmbushur detyrat e detyrimet e saj kombëtare e ndërkombëtare. Edhe kjo është një shpifje njëlloj si e para, por kjo e dyta bazohet në sindromën obsesive të një njeriu që çdo mëngjes kthen përmbys kolltukët, se mos i kanë vendosur ndonjë përgjues, bashkëpunëtorët, se dyshimin, ai e ka te bashkëpunëtorët e tij. Por kjo nuk është detyra ime. Detyra ime është ta respektoj plotësisht kundërshtarin dhe e kam faktuar këtë.
Shqipëria ka marrë kryesimin e Komitetit të Ministrave të Këshillit të Europës. Cilat janë prioritetet e presidencës shqiptare?
Kryeministri Berisha: Ne kemi marrë kryesinë e radhës dhe kemi përcaktuar si moto “Të bashkuar në diversitet”. Ne besojmë se mund të japim kontributin tonë nën këtë moto. Një moto që është e vlefshme për Europën, por edhe më gjerë. Ne jemi një komb plurifetar, por do të thosha me një virtyt të shkëlqyer që konsiston në respektimin e besimit të tjetrit, me të cilin ne mund të kontribuojmë. Çështja e rinisë do të jetë çështje tjetër. Gjithashtu, vazhdimi i reformave që ndërmori presidenca britanike lidhur me Gjykatën e Strasburgut. Një drejtim tjetër do të jetë përpjekja për të afruar vendet e Pranverës Arabe me Këshillin e Europës, në mënyrë që ata të mund të përfitojnë nga ekspertiza e shkëlqyer që institucioni më i vjetër demokratik i Europës së pasluftës disponon dhe është shumë pozitive që ato po bashkëpunojnë ngushtë. Komisioni i Venecias, që pa diskutim është lider në hartimin e Kushtetutave dhe ligjeve të tjera, po punon me to. Po kështu departamente të tjera të Këshillit të Europës kanë eksperiencë shumë të madhe që mund t’jua ofrojnë këtyre vendeve. Duke e konsideruar një privilegj të madh që, në 100 vjetorin e pavarësisë së saj, Shqipëria, një prej demokracive më të reja të kontinentit, kryeson tempullin më të vjetër të demokracisë europine. Kjo ka një simbolikë të jashtëzakonshme për Shqipërinë e shqiptarët.
Deklaratat tuaja për rivlerësimin e figurave historike dhe të vetë historisë, zoti Kryeministër, kanë ngjallur jo pak reagime e debat publik. Ju jeni akuzuar për revansh. Pyetja ime është e drejtpërdrejtë: revansh në emër të kujt, në rast se ka dhe a është revanshi qëllimi juaj?
Kryeministri Berisha: Së pari, vlerësoj të gjithë ata që angazhohen në një debat, analizë e shqyrtim të historisë në kuadër të 100 vjetorit të datëlindjes së Shqipërisë së sotme. Thirrja ime ka qenë e mbetet: Të bëjmë gjithçka për ta shndërruar këtë 100 vjetor në piedestalin e të vërtetave tona kombëtare në këto 100 vite. Ne kemi ardhur në 100 vjetor si një komb, i cili për 45 vjet ishte me histori të falsifikuar apo të ndaluar dhe kam kënaqësi që edhe ata, të cilët për arsye strikt politike aktuale, vërsulen e më atribuojnë gjëra që nuk i kam thënë, por të paktën po i afrohen të vërtetave që duhet të dalin. Unë nuk i kam kërkuar kujt, kurrë, të shkruajë këtë apo atë, për historinë e vendit dhe nuk e bëj këtë. Por ata, të cilët mendojnë se Kryeministri i vendit nuk mund të flasë për historinë e vendit të tij, janë qesharakë, për të mos thënë më shumë. Unë u them këtyre zotërinjve se historia dhe politika janë binomi më i pandarë. Historia është veprimi politik i djeshëm, sikundër politika është veprimi historik i sotëm. Natyrisht kanë identitete të ndryshme. Njëra është përshkrim, tjetra veprim. Këtyre zotërinjve, që u duket se po jua prekin pavarësinë, ju garantoj se asgjë nuk mund të më pengojë, qoftë si kryeministër, intelektual apo qytetar, për të mos mbrojtur ato të vërteta që besoj. Ne erdhëm si komb me histori të ndaluar, me histori të falsifikuar. Ne kemi përgjegjësi para vetes, por, mbi të gjitha, para fëmijëve tanë, të mësojmë të vërtetat. Nuk ka diskutim që kjo Shqipëri është bërë nga patriotët. Ata që e kanë dashur e kanë bërë këtë vend dhe pa dashurinë, përkushtimin e sakrificën e tyre, ky vend nuk do të ishte sot, 100 vjeçar. Por kjo nuk mund të na pengojë të shohim të gjitha dritëhijet e historisë sonë. Kam pasur e kam qëndrim të palëkundur ndaj luftës nacionalçlirimtare, si një ndër faqet më të ndritura të historisë sonë, por ata që duan të mohojnë aspektet e saj vëlla-vrasësë, që duan të mohojnë financimin e kontributin e aleatëve të mëdhenj, në radhë të parë të Britanisë së Madhe, në këtë luftë, ata vazhdojnë melodinë e vjetër hoxhiste. Ata, të cilët duan ta shohin historinë me gjyzlykët e hoxhizmit, harrojnë se ato janë me syzet e falsifikimit.
Jam jashtë çdo lloj idealizmi dhe idealizimi dhe unë them se ky 100 vjetor nuk është një panair lavdie dhe nuk mund të jetë, sepse kështu e kemi pasur të shkuarën. Por duhet të jetë një 100 vjetor analize. Ideja se Berisha po nxjerr në pah figura nga veriu e Kosova është thellësisht e kryekëput antikombëtare. Nëse dikush mendon se veriu e Kosova duhet të përjashtohen nga historia kombëtare, nuk ka qëndrim më antikombëtar se ky. Unë jam i bindur se Enver Hoxha e përjashtoi Ahmet Zogun se ishte nga Mati. Jo! Por sepse ai e errësonte çdo ditë, pushtetin e tij mizor dhe e kërcënonte. Hoxha bëri gjithçka për të hedhur një mal shpifjesh e trillimesh ndaj tij e luftëtarëve që vazhduan luftën dhe ne duhet të themi se ishin agjentë të këtij apo atij. Të themi se Enver Hoxha, i cili bëri gjithçka për ta shndërruar Shqipërinë në republikë të 7-të jugosllave. Nuk bëri këtë, por e bëri Abaz Kupi se u thirr nga Stambolli në Beograd, për t’u mbështetur në rezistencën e tij të armatosur. Historia duhet të gjykohet në kontekstin e kohës e të rrethanave. Nuk kam kritikuar kurrë, Enver Hoxhën pse bashkëpunuan me jugosllavët. Aspak, se në atë periudhë ushtria çlirimtare jugosllave ishte ushtria partizane më e fuqishme e Europës dhe kjo nuk mund të mohohet. Por ka qenë tradhti e vërtetë kombëtare qëndrimi i tij ndaj aktit të Bujanit, ku u firmos që çështja e Kosovës të zgjidhej pas luftës, me plebishit dhe ky e grisi. Ka qenë makabritet qëndrimi i tij ndaj genocidit të shqiptarëve dhe masakrës së Tivarit, ka qenë antikombëtar qëndrimi i tij ndaj nacionalistëve që luftuan dhe shpalli armiq, burra, tribunë të vërtetë të lirisë së shqiptarëve. Pretendoi se Kryeziu ka qenë bashkëpunëtor i jugosllavëve, por e vërteta është Kryeziu dhe kryezinjtë kanë pasur rol vendimtar në shpalljen e pavarësisë në Vlorë. Është i ati i tij që mbrojti më shumë se kushdo tjetër qeverinë e Vlorës dhe u përlesh me falangat e verioepirotëve të Spiro Milos në Himarë e zona të tjera. Historinë duhet ta themi! Luftëtarët e lirisë të kësaj njësie nuk ishin një brigadë. Ata ishin gjithsej 300 vetë dhe një pjesë e tyre përfunduan në një pus, të ekzekutuar të gjithë nga Fadil Hoxha dhe Enver Hoxha. Ata ishin burra që luftuan katër vjet dhe u angazhuan në një seri operacionesh kundër armikut. A duhet të heshtim?!
I gjithë pretendimi se kryeministri po përzihet në histori, në fund të fundit, ka avokatinë për të mbrojtur dogmën hoxhiste të mashtrimit të historisë. Unë nuk jam për idealizimin e historisë. E kam theksuar dhe e theksoj se eliminimi i kundërshtarëve politikë nga Ahmet Zogu është shumë e rëndë, e pafalshme. Disa prej tyre kanë qenë njerëzit që kam admiruar e admiroj më shumë, por e vërteta është se edhe ata donin ta vrisnin e po komplotonin në mënyrën më të vendosur kundër tij, por sërish nuk duhej t’i vriste. Kur thotë kryeministri se ’24-a ishte grusht shteti, reagojnë në mënyrën më të fuqishme, por kur e pranon edhe vetë Noli se ishte grusht shtetit, këtë e fshehin, e falsifikojnë. Atëherë do t’i bëjmë elozhe grushtit të shtetit?! Noli është gjeni. Në letrat shqipe, nuk ka njeri që të kem lexuar e ta dua më shumë se Nolin. Por jo në politikë! Të mos ngatërrojmë puçistin me autorin e Albumit, themeluesin e Kishës Autoqefale me puçin e ’24-s. Duhet të jemi njerëz të emancipuar e të nxjerrim të vërtetat siç janë.
Së fundi ka lindur një tjetër debat, mbi numrin e dëshmorëve. Nuk e di sa është, por e sigurt është se shqiptarët kanë luftuar me vendosmëri të madhe në Luftën e Dytë Botërore dhe me luftën e tyre kanë ngjallur admirim të madh. Por një mënyrë për të poshtëruar të vdekurit është të shpallësh martirë ata që nuk janë, të shpallësh dëshmorë një numër fiktiv. Shqiptarët e dinë mirë sa u vranë në fshatin, qytetin e rrethin e tyre. Por del e trillon për qëllime paranojake. Dikush mund të thotë se e bëri për interesa, por absolutisht jo, sepse lufta ishte e tëra e regjistruar nga ata, të cilët trajnonin, pajisnin e financonin këtë luftë. Kudo, në çdo njësi ishin vendosur oficerë britanikë. Mbi 140 aviatorë e oficerë të Forcave Ajrore Britanike kanë rënë në Shqipëri. Oficerë të gradave më të larta kanë lënë jetën në Shqipëri. Kjo nuk dot thotë aspak se luftën e bënë ata, pasi luftën e bënë shqiptarët, por ndihma e tyre ishte jetike dhe mohimi i këtij fakti është një nga faqet më të zeza të atyre që shkruan e fshehën historinë. Të përdorësh qëndrime të qeverisë britanike për të justifikuar akte të caktuara – ndërkohë që Londra ishte kryeqyteti i luftës. Po të lexoni letrat e ish ministrit të Jashtëm të asaj kohe, Çërçilli thotë se në qoftë se Shqipëria do të ishte pushtuar nga Italia, pasi Britania e Madhe i shpalli luftë asaj, - kur u pushtua Shqipëria nuk reagoi kush, të gjitha fuqitë e mëdha perëndimore të asaj kohe e bekuan atë pushtim me heshtje, kjo është e vërteta - mbreti Zog do të ishte pritur me pompë të madhe, siç u pritën mbretërit e tjerë që ikën dhe u erdhën në Londër. Mbreti nuk pranoi kushtet, nuk kapitulloi dhe kjo është e njohur. Çfarë leverdie ka që sot të ruajmë falsitetin historik e të mos nxjerrim të vërtetën, apo të bëjmë insinuata absurde se Berisha do të nxjerrë Zogun mbi Ismail Qemalin. Ndërkohë që dy janë figura të pakrahasueshme. Ismail Qemali është themelues i pavarësisë. Kjo është më e pakundërshtueshmja, por nuk e lanë, për të mos thënë se e përzunë. Ai [Ismail Qemali] nuk erdhi me qëllim që të ikte nga Shqipëria, përkundrazi, vuri bazat e një pushteti në kushtet më të vështira, me kurajë mbinjerëzore. Aventurierë shqiptarë, në bashkëpunim me të huajt, bënë që të largohej. Edhe Zogun e detyruan të largohej, i bënë puç, por ai u kthye.
Unë mendoj se historia duhet të rishkruhet e të vërtetat të dalin edhe kur janë të hidhura. Është shumë e papranueshme për një komb që kryetari i Kongresit të alfabetit, që i dha alfabetin latin gjuhës sonë, të jetë mohuar në këtë mënyrë, siç është mohuar Mithat Frashëri. Ndërkohë që emrin e një djali të ri, patriot i flaktë, i cili la studimet në Itali e kthye në vend për të luftuar, por u vra dhe nuk ia doli dot të bëhej as udhëheqës brigade, as udhëheqës batalione dhe as udhëheqës çete, e mbajnë dhjetëra rrugë e objekte në vend.
Ky qëndrim është i qytetëruar. Kjo ndodh për dy arsye. Së pari, një mik i imi më thoshte se kisha të drejtë, por po të shkruante këto, ku do të shkonin ato mijëra faqe që kishte shkruar më parë. I përgjigjem: i shkruaj prapë, kush të pengon. Në të kundërt do të të mbeten si blozë në dritën e së vërtetës. Së dyti, i sponsorizon shoqja Nexhmije, e cila vazhdon me angazhim e përkushtim të madh të mbrojë aktet barbare e mizorinë e saj e të shoqit të saj.
Zoti Kryeministër, në fakt kam një pyetje nga aktualiteti. Ju nuk e përmendët reformën zgjedhore si një nga arritjet që janë bërë gjatë periudhës që nuk keni dalë në konferencë shtypi. Reforma zgjedhore u krye. Kryetari i PS-së Edi Rama duket i kënaqur, pasi thotë se ka marrë garanci se zgjedhjet nuk do të vidhen dhe ai do të fitojë, por ndërkohë ka mbetur përgjysmë heqja e imunitetit, ndryshimet kushtetuese që ju i keni dorëzuar në parlament. Pyetja ime është a jeni penduar që nuk e pranuat propozimin e zotit Rama, kur një nga katër propozimet e tij ishte heqja e imunitetit, kur negocionit për presidentin, sepse PS-ja duket se do ta shtyjë këtë projekt pas këtij sesioni?
Kryeministri Berisha: Lidhur me reformën zgjedhore, unë jam shumë i kënaqur që reforma do të votohet. Jam gjithashtu shumë i kënaqur për të gjitha koncesionet që kemi ofruar në këtë proces. E kam theksuar dhe e theksoj se është në detyrimin e qeverisë të bëjë koncesionet maksimale të mundshme në ligjin e zgjedhjeve. E garantoj zotin Rama se edhe në ligjin tjetër, të 2016-s, sërish do t’i bëhet çdo lëshim që ai ka nevojë, pasi ne ndahemi në dy koncepte. Përveç asaj që thashë se i takon qeverisë të japë siguritë, unë besoj tërësisht se nuk është ligji që të jep fitoren, por janë qytetarët shqiptarë, janë zgjedhësit. Zoti Rama beson se fiton nëpërmjet ligjit. Unë e vlerësoj faktin se ai është i kënaqur me reformën, por më trishton pak fakti që ai kënaqësinë më të madhe e ka për ndryshimet që u bënë për Tiranën, pasi gjuha shkon ku dhemb dhembi. Na vunë kusht ose të kontrollohen një më një zgjedhësit në Tiranë, ose s’bëhet. Unë e mirëkuptova dhe vumë kontrollin e kartës së identitetit, njëlloj si në kufi. Zgjedhësit do të futen në qendrën e votimit, sikur po hynë në një pikë kalimi kufitar. Por ai e kërkoi dhe unë e pranova.
Lidhur me imunitetin, unë nuk e di cili është qëndrimi përfundimtar i zotit Ram dhe i Partisë Socialiste, por dua të theksoj disa gjëra. Ligji që dorëzuam në parlament për ndryshimin e Kushtetutës dhe ligji për organizimin e drejtësisë, në çdo germë, në çdo nen, pikë për pikë është ai që kanë paraqitur ekspertët e Këshillit të Europës dhe të EURALIUS. Unë personalisht e kam lexuar dhe e kam gjetur një ligj të mrekullueshëm. Një ligj ndër më të mirët, që i bën nder këtij vendi dhe çdo shqiptari. Në vlerësimin tim, nuk mund të ketë asnjë politikan që të mund të dalë para qytetarëve e t’u thotë unë do të rri me imunitet. T’ju them të vërtetën, kjo është njëlloj si t’ju thoshte më falni, po unë kam pak dorë.
Ligji që kanë sjellë është një variant i shkëlqyer, madje nuk shkon ta shqiptarizojmë, le ta lëmë siç e kanë sjellë. Lexojeni dhe do ta shihni se është jashtëzakonisht i bazuar në doktrinë. Imuniteti është mbrojtje e pushteteve nga njëri-tjetri dhe nuk ka të bëjë aspak me personin. Është tjetër gjë si konceptohet, por imuniteti nuk ka të bëjë me personat, por me mbrojtjen e pushteteve nga njëri-tjetri. Nëse do ta lexoni, do të pëlqeni shumë zgjidhjen që ekspertët e Këshillit të Europës i kanë dhënë. Deputeti është i barabartë me qytetarin në gjithçka, me një dallim se qytetarit i duhet të shkojë nga Gjykata e Faktit tek Gjykata e Lartë, ndërsa deputetit, ministrit i është dhënë e drejta të gjykohet në çdo veprim, nga Gjykata e Lartë, institucioni suprem i drejtësisë së vendit. Së dyti, ligji ka një klauzolë të shkëlqyer, në parimin se imuniteti është për të mbrojtur pushtetet nga dëmtimi i njëri-tjetrit, nga marrja e njëri-tjetrit dhe heqja e imunitetit mund të revokohet dhe çdo masë, në qoftë se vlerësohet nga parlamenti se kjo bëhet për të prishur, dëmtuar funksionimin e parlamentit. Por ligji shkon edhe më tej. Një vendim kaq i rëndësishëm, përballë një pushteti që është themelor në vend, nuk i jepet shumicës parlamentare, por hartuesi i draftit ia jep edhe deputetëve nën shumicën parlamentare, çka do të thotë se mund ta ketë edhe grupi i opozitës. Po ta kërkojë rivendosjen e imuniteti, po ta gjykojë se heqja e imunitetit po bëhet me qëllim për të dëmtuar funksionimin e tij, ai kërkon rivendosjen e imunitetit. Pra, kanë bërë këtë zgjidhje dhe unë e ftoj zotin Rama ta pranojmë këtë standard të shkëlqyer e të falenderojmë ekspertët, të cilët për mendimin tim kanë sjellë një nga variantet më të shkëlqyera. Të mos harrojmë se ka vende në Europë, me zero imunitetit për çdo gjë, madje nuk kanë të drejtë të vlerësohen vetëm nga Gjykata e Lartë.
Të mos harrojmë se ky hap do të shënonte një etapë të re, të madhe, në luftën kundër korrupsionit, në barazinë e qytetarëve para ligjit. Mendoj se me këtë draft është dhënë përgjigja më e shkëlqyer. Unë e kam lexuar të gjithë arsyetimin dhe është jashtëzakonisht bindës.
Shkojmë më tej. Ju e të gjithë shqiptarët jeni dëshmitarë se Partia Socialiste kundërshtonte heqjen e imunitetit nëpërmjet ndryshimit të ligjeve organike dhe kërkoi ndryshimin e Kushtetutës, edhe pse kjo ishte rekomanduar nga Komisioni i Venecias. Është shumica, ajo që bëri lëshimin. E kam thënë edhe më parë se zoti Rama e ka shumë të vështirë të dallojë fitoren nga disfata. Ai po fiton, pasi, para të gjithë shqiptarëve, ai kërkoi heqjen e imunitetit me Kushtetutë dhe ne, që më parë e kishim kundërshtuar këtë, tani po themi po. Zoti Rama thotë se këshilli i miliarderëve është në anën time. Atëherë e pyes, zoti Rama, ti po mbron këshillin tim të miliarderëve, ministrat e mi? Nuk mund të ndodhë kurrë që një lider opozite të mbajë qeverinë me imunitetit. Ndaj uroj e dëshiroj ta kalojmë. Kësaj here e kemi më të thjeshtë, pasi, së pari, mazhoranca ka pranuar plotësisht variantin e opozitës. Së dyti, varianti që është dorëzuar është në përputhje të plotë me kërkesat e mëparshme të opozitës dhe është një kryevepër të vërtetë në jurisprudencë, me konceptin që ekspertët e Këshillit e Europës e të EURALIUS-it kanë sjellë. Gjykoj se nuk na mbetet gjë tjetër, veçse ta bëjmë këtë vend më të lirë, më të drejtë. Përse duhet ta mbroj imunitetin? Kjo është e pakonceptueshme. Megjithatë ne do të ulemi me ta. Përshëndes gjithashtu parlamentin që përcaktoi një datë, 6 gushtin, për t’i dhënë mundësi votimit, i një rëndësie të madhe për çdo qytetar shqiptar.
Lufta kundër korrupsionit është e duhet të jetë beteja kryesore në çdo vend të lirë. Dje po ndiqja një seminar mbi krimin e organizuar dhe funksionimin e Gjykatës së Krimeve të Rënda. Propozimet ishin shumë të drejta. Përse të mos e shpallim korrupsionin vepër të rëndë? Nuk ka asgjë më të vetëdijshme, asgjë më të dëmshme e më të organizuar, nuk ndodh kurrë me një autor, pra, është në definicionin e krimit të organizuar. Mendoj se duhet ta bëjmë plotësisht edhe këtë hap dhe unë e ftoj zotin Rama, pasi kjo do të ishte në interesin më të mirë të vendit. Krahas teknologjive, transparencës, ne duhet të konsolidojmë praktikat ndëshkimore kundër tij. Në parlament janë dërguar edhe dy ligje të tjera për konfliktin e interesit dhe deklarimin e pasurive. Edhe këto dy ligje i japin dimensione të reja këtij procesi. Mos harroni se kjo që po bëjmë përfshin tërësisht sektorin publik dhe sigurisht që është pjesa më e rëndësishme, por lufta kundër korrupsionit në Shqipëri ende nuk është shtrirë në sektorin privat. Edhe në këtë sektor ka, por nuk mund të shtrihesh atje pa konsoliduar fuqishëm këtë luftë, në sektorin publik.
Zoti Kryeministër, ju flisni shpesh për ekonominë shqiptare që i ka rezistuar krizës në eurozonë e më gjerë, por ndërkohë mes qytetarëve, tregtarëve ka një pakënaqësi për rënie të konsumit. Këto dy qëndrime që nuk përputhen. Keni menduar se kanë si bazë një shkëputje tuajën nga realiteti.
Kryeministri Berisha: Për ekonominë shqiptare, unë preferoj të flas me të dhëna të institucioneve ndërkombëtare. Jo se nuk e di që në këtë vend janë një numër i konsiderueshëm qytetarësh pa punë dhe se ata robtohen në hallet e dertet e përditshme të tyre, me dhimbje të pandërprera. Jo se nuk e di se ka biznese, të cilat falimentojnë. Jam i vetëdijshëm se ka biznese që përballem me arbitraritete administrative. Por të gjitha këto nuk mund të përmbysin faktet se ekonomia shqiptare ka pasur një rritje, sipas Komisionit Europian, katër herë më të madhe se mesatarja e rajonit dhe kjo është një arritje e jashtëzakonshme për shqiptarët. Imagjinoni sikur kjo rritje të ishte katër herë më e vogël. Dhe unë po flas me të dhënat e institucioneve ndërkombëtare. Të gjitha këto ekzistojnë, por fakti është se dy raportet e fundit, ndër më seriozet në botë, pohojnë se në Shqipëri nuk u rrit, por u ul papunësia. Të gjitha këto qëndrojnë, por fakt është se në Shqipëri, vitin e kaluar u investua mbi një miliardë dollarë dhe konvertojini ato në vende pune, në paga. Kjo përbën edhe një nga faktorët kryesorë përse kjo ekonomi ka rritje. Pra, këto që themi ne kanë një konfirmim të gjithanshëm. Unë nuk besoj se këto nuk janë suksese të mëdha, në kontekstin e një kohe të krizës së madhe. Referohuni rrogave e pensioneve. Rritje misterioze rrogash, thotë makineria e Partisë Socialiste. Po përse misterioze?! Rrogat do të rriten në vlerën që është thënë dhe me këtë rritje, Shqipëria lë mbrapa dy-tre vende të Bashkimit Europian në rrogën mesatare. Pensionet do të rriten, në një kohë kur jo një, por disa vende i kanë ulur me 20, 40 përqind, sipas rastit.
Unë nuk them se kriza nuk ndikon, por e vërteta është se ekonomia shqiptare po reziston. Rastet që ju thoni nuk mund të përgjithësohen. Janë raste pa diskutim. Nga ana tjetër, ne qëndrojmë të bëjmë gjithçka për të fuqizuar sektorin privat. Raporti i Komisionit Europian thotë se, në qoftë se punësimi në sektorin shtetëror u ul me 0.6 përqind në vitin 2011, punësimi në sektorin privat u rrit me 5.5 përqind. Ne kemi një platformë të drejtë e model të qëndrueshëm. Ndërsa modeli që ofron rivali opozitar është të anulojë të gjitha koncesionet e investimet e huaja. Ka ndonjë opozitë kund në Europë që të bëjë një deklaratë të tillë? Ishte kjo opozitë që u mor gjashtë muaj me koncesionet e hidrocentraleve dhe nuk arriti të faktojë qoftë edhe një akuzë të vetme. Kjo është politika e opozitës, ndërsa unë shkoj në çdo qoshe të vendit dhe inauguroj hidrocentrale, në sajë të asaj politike që i besuam dhe e implementuam. Ai thotë se do të anulojë gjithçka në këto investime. E pyes, po një miliardë dollarë të kthyera në vende pune, do t’i shtetëzosh? Nuk e gjykoj të drejtë këtë politikë. Problemi është shumë serioz. Me këto qëndrime, opozita shndërrohet në një kahje, që unë nuk e dua, në një aleat të jetëgjatësisë së këtij pushteti. Të gjithë ata që e dëgjojnë se do të anuloj këtë dhe atë, thonë: Zoti na ruajt nga kjo opozitë!
Pyetja ka të bëjë me reformën zgjedhore, lidhur me kërkesat e partive të vogla, aleate si të Partisë Socialiste, ashtu edhe të Partisë Demokratike. Bashkëkryetari socialist i komisionit për reformën zgjedhore ka thënë se ishte PD-ja, ajo që nuk donte të merrte parasysh kërkesën për korrektimin e sistemin zgjedhor. Si qëndron e vërteta?
Kryeministri Berisha: Po e shpjegoj me një shembull. Gjatë periudhës së dialogut për presidentin, u ula me zotin Rama dhe zotin Ruçi. Një bisedë e shtruar dhe gjykoj se ai proces shërbeu shumë vendit. Në mënyrë të papritur, kur, sapo zoti Shpëtim Idrizi përmendi emrin e Fatos Nanos, Gramoz Ruçi kërcen e më thotë mua se nuk isha dakord me Nanon. I them se qëndrimin tim e kam bërë publik, se zoti Nano është lider historik i së majtës dhe po të jetë për këtë, votoja një figurë historike të së djathtës e nuk mund të votoja figurë të së majtës. Ti, i them zoti Ruçi, para një jave drekove 4 orë me zotin Nano. Po, më thotë Ruçi, por atij [Nanos] i thashë se çfarë shërbimesh i ke bërë PS-së dhe çfarë shërbimesh i ke bërë Berishës. Këtë shembull e përmenda për të nxjerrë në pah të vërtetat e deklaratave të tyre, pasi e kanë më të lehtë të akuzojnë Berishës për gjithçka.
E vërteta është se në reformë ju është përmbajtur rekomandimeve të OSBE/ODIHR-it. Nuk ka qenë një proces i thjeshtë, por mjaft i komplikuar. Fatmirësisht u gjet gjuha e përbashkët dhe pretendimet e tyre për përdorimin e mjeteve elektronike u rritën dhe ne i pranuam. Ndonëse ne pranuam shumë gjëra, pasi jemi për koncesione e kompromis. Duhet të jemi të sinqertë se ky ishte një kapitull që kërkonte ndofta një kohë shumë më të gjatë. Kështu të paktën folën njëri me tjetrin ata që u morën me reformën. Pastaj se ç’ju thonë juve është si shembulli që dhashë më lart.
Përsa i përket kërkesës së partive të vogla për korrektimin kombëtar të sistemit, ka mundësi të merret parasysh në vjeshtë të këtij viti apo vitin që vjen?
Kryeministri Berisha: Por a kam unë, tagër të flas për një reformë që mezi e kryem, për shkak të një atmosfere, ku çdo germë shihej me lupë. Unë jam shumë i kënaqur që u përfundua, por nuk ka qenë proces i thjeshtë. Ishte një proces hektik. Me gjithë dëshirën që mund të kem, unë nuk kam tagër të them se do të hapet sërish reforma. Po ta kisha shkruar unë atë ligj, do ta shkruaja dhjetë herë ndryshe.
Zoti Kryeministër, si i gjykoni zërat kritikë së fundmi, të dy deputetëve tuaj, për një rithemelim të PD-së dhe kërkesën për ndryshime të thella në qeveri?
Kryeministri Berisha: Partia Demokratike është parti e fjalës së lirë. Nuk ekziston kurrë në këtë parti dhe nuk do të ekzistojë tendenca më e vogël e trysnisë mbi mendimin e fjalën e lirë. Ne e kemi faktuar këtë. Ju e dini të gjithë se kur vjen puna për të folur, në krahun tjetër, një përgjigje pa leje nuk jua japin. Unë ju ftoj ta kundërshtoni këtë, në emër të respektit për fjalën e lirë.
Për t’u rikthyer tek çështja e imunitetit. Ajo që opozita po tenton është jo vetëm të ndryshojë Kushtetuta për imunitetin, por edhe për çështje të tjera. Do të ishit i gatshëm për këtë? A ka nevojë Kushtetuta për ndërhyrje të tjera?
Kryeministri Berisha: Unë gjykoj se për Kushtetutën e Shqipërisë nuk ka në mënyrë kategorike veçse komente e vlerësime ndër më pozitivet. Në vitin 2008, me zotin Rama, ne bëmë një reformë kushtetuese që unë do ta quaja të një rëndësie shumë të madhe për vendin. Por ai është si puna e haxhi pishmanit, pendohet për çdo veprim që bën. Unë nuk pendohem. Kur del gabim, unë mbaj përgjegjësi. Pendimi nuk shërben. Tani, ai thotë se është ngutur. Sërish nuk është i sinqertë. Nuk u ngutëm, por është punuar katër muaj për to, me grupet e mirëbesimit. Mund të ketë qenë procedura në fund, por puna ka qenë shumë mujore. Kushtetuta, me ato ndryshime, ju garantoj se është sot një nga dokumentet më të shkëlqyer ligjor për të drejtën kushtetuese moderne. Por që ta bëjmë Kushtetutën si vegun e Penelopës, e kam deklaruar këtë nuk mund ta bëj. Po, imuniteti është një standard i tepërt në Kushtetutë, sepse imuniteti ka ardhur duke u hequr progresivisht, derisa sot ka vende që kanë zero imunitet. Nuk mund të kërkosh tani, për ta shpërbërë Kushtetutën mbi bazën e pendesës, që në fakt ia induktojnë të tjerët, sepse thellë në vetvete ai nuk mund të ketë. Unë besoj se ai ka qenë një akt shumë mirë i medituar.
Duke iu kthyer relacioneve të politikës me historinë, por me historinë që po konsumojmë tashmë dhe protagonistët e saj janë politikanët, unë desha të di në raport me aktualitetin e reformës zgjedhore që ka sjellë rezultate pozitive e si vëzhgues i situatës rajonale elektorale, nëse në zgjedhjet e 2013, ne do të kemi mundësi të vëzhgojmë humbësin që do të urojë fituesin dhe sigurisht pranimin e rezultateve. Kjo pyetje është në titullin e kryeministrit. Ndërsa në atë të kryetarit të Partisë Demokratike, pas zgjedhjeve të 2013, që sigurisht ju i parashikoni të fituara, në rast humbjeje, çfarë do të bëjë Sali Berisha?
Kryeministri Berisha: Së parë, edhe si Kryeministër, edhe e si kryetar partie, unë shkoj në këto zgjidhje me vendimin parë të pandryshuar të pranoj verdiktin e qytetarëve shqiptarë. Së dyti, kur njeriu imagjinon të paimagjinueshmen është puna e tij, por të garantoj se në politikën e këtij vendi, çfarëdo që të votojnë qytetarët shqiptarë, unë do t’u them faleminderit, sepse jam shumë, shumë i detyruar ndaj tyre. Jam i bindur se do votojnë për vazhdimin e projektit që kemi përpara, për një mandat të paprecedent në histori, por çdo verdikt që do të japin do të respektohet me vendosmërinë më të madhe.
Në rastin hipotetik, nëse do të ketë humbje, zotin Sali Berisha do ta kemi kryetar të Partisë Demokratike?
Kryeministri Berisha: Edhe një herë, unë do të marr të gjitha vendimet që do të diktojë sovrani dhe do t’i marr ato, me vendosmërinë më të madhe.
Pyetja lidhet me marrëveshjen e nënshkruar së fundi me PS-në për reformën zgjedhore. Partitë e vogla, midis të cilëve edhe aleatë tuaj, e kanë cilësuar pazar, këtë marrëveshje, që nuk sjell përmirësime, por është bërë për t’i hedhur hi syve ndërkombëtarëve. Duke parasysh që çelësi i suksesit në procesin zgjedhor varet shumë nga madhësia e koalicioneve, mendoni se do keni probleme?
Kryeministri Berisha: Aleatët i garantoj se u përpoqa të bëj më të mirën e mundshme, por kapitulli i aleancës me ta është një kapitull luajaliteti, besnikërie e mirëkuptimi. Që nga dita e parë që jam në politikë e gjer më sot, po t’u referohesh mediave kundërshtare dhe jo vetëm, nuk do të gjeni kurrë në to, një fjali të vetme se Sali Berisha na tradhtoi. Unë kam besimin tek aleatët dhe jo tradhtinë ndaj tyre, ndaj do të bëj gjithçka për të konsoliduar koalicionin më të shkëlqyer në zgjedhjet e ardhme.
Ju thoni se kriza ekonomike nuk e ka përfshirë ekonomë shqiptare, por është e pranishme në Europë. Për të shmangur pasojat e saj, keni parashikuar politika favorizuese për biznesin kryesisht atë të vogël, si pjesë e rëndësishme e ekonomisë, për mos i falimentuar këto biznese?
Kryeministri Berisha: Unë besoj se Shqipërinë nga kjo krizë, e cila ka qenë kriza më e stuhishme dhe më e fuqishme që nga vitet ’30-të të shekullit që shkoi, e ka mbrojtur modeli ekonomik që ne vendosëm. Model, i cili ka si parim kryesor: mbështetjen maksimale të biznesit. Në këtë kontekst, dua ta theksoj se të gjitha reformat që ne ndërmarrim kanë parasysh para së gjitha e mbi të gjitha, biznesin. Ne kemi vendosur disa nga praktikat më moderne që ekzistojnë në Europë, në raport me biznesin. Ne kemi vendosur barrën fiskale më të lehtë. Por kemi potenciale të tjera të mëdha, që pa diskutim do shpalosen. Jam plotësisht dakord që ky biznes është i vogël në xhiro, por është shumë i madh për vendin, është punësuesi kryesor e kjo jo vetëm në Shqipëri, por edhe në vende të zhvilluara. Ne do të bëjmë gjithçka për të dhe për bizneset e tjera. Dallimi është se para gogolit të taksës marksiste, do të jenë masat që do të zgjerojnë më tej lirinë fiskale. Në qoftë se ka një faktor që e ka sjellë botën në këtë krizë të tmerrshme është evazioni i madh fiskal, i diktuar nga taksa progesive. Unë i besoj shumë kësaj. Ndaj, më tej do kemi masa të tjera lehtësuese, por po pres që kundërshtari të shpallë taksën e tij marksiste dhe nivelin e saj, në mënyrë që t’i përgjigjemi me stimulin e lirisë fiskale.
Pyetja e parë lidhet me rishikimin buxhetit, i njoftuar fillimisht mbase në këto kohë. A do të kemi rishikim të buxhetit në muajin shtator apo po priten apo mbase kjo ka qenë arsyeja kryesore, privatizimet e mëdha si Albpetrol dhe katër hidrocentralet? Pyetja e dytë. Janë parashikuar dy ankande bonosh në muajin korrik e gushat, në rreth 30 milion euro. A është kjo një strategji apo zgjidhje e detyruar, në kushtet kur vendi ynë përballet me vështirësi në huamarrjen e jashtme, apo është një strategji për të menaxhuar prurjet e emigrantëve, në kushtet kur ka pasur tërheqje depozitash në bankat e vendeve fqinjë?
Kryeministri Berisha: Nuk ka një vendim përfundimtar për rishikimin e buxhetit. Sot, çdo njeri i interesuar për ekonominë gjen një debat të madh midis platformës së rreptësisë fiskale, platformë që konsiston në reduktimin progresiv të madh të borxhit dhe deficiteit buxhetor, me shkurtime të mëdha shpenzimesh e rritje të taksave. Zërat në rritje që e kundërshtojnë këtë jo si praktikë të gabuar, por si mjet të vetëm, krahas kësaj kërkojnë të ndërmerren hapa të sigurt për të nxitur rritjen ekonomike dhe punësimin, sepse duke shkurtuar shpenzimet e rritur taksat, së pari, t’i eliminon mundësinë e biznesit për t’u zgjeruar, përkundrazi, në proporcion e zvogëlon atë dhe zvogëlon vendet e punës; së dyti, duke shkurtuar shpenzimet, zvogëlon kontributin e sektorit publik në nxitjen e rritjes ekonomike. Kjo është e faktuar. Por edhe rritja e shpenzimeve dhe thellimi i deficitit buxhetor dhe i borxhit jashtë përmasave të caktuara është me pasoja serioze. Rryma e dytë kërkon nxitjen e rritjes ekonomike dhe e konsideron këtë të domosdoshme. Ata kërkojnë që të ketë investime, pavarësisht nga ndikimi që kjo të ketë në borxhin publik; kërkojnë një politikë që të mbrohen vendet e punës.
Në rrafshin ndërkombëtar është fiksuar një limit i borxhit prej 60 përqind. Në rajon, është e vërtetë se vendet e tij e kanë pasur borxhin shumë më të ulët se ne, 20, 30 mundet edhe 15 përqind. Në qoftë se nga viti 2008 e deri më sot, borxhi në Shqipëri është luhatur në 58-60 përqind, - këtë tremujor ishte 57 përqind, por që sigurisht do të jetë pak më i lartë në tremujorin tjetër, pasi ka arsyet e veta, - në këto vende borxhi nga kaluar nga 24 ka kaluar në 54 përqind, nga 15 në 38 përqind. Një nga arritjet më të mëdha të këtij vendi ka qenë kur, në mënyrë të vetvetishme, këtu është vendosur ligji i artë i Phelpsit, i viteve ’60, i cili dikton të mos merret borxh, përveçse për investime. Dhe e vërteta është se ne nuk kemi marrë asnjë qindarkë tjetër borxh, përveçse për investime. Në qoftë se të tjerët kanë marrë borxh për shpenzime të tjera si rroga, pensione etj., ne nuk kemi marrë asnjë qindarkë. Përkundrazi, nga të ardhurat buxhetore, ne kemi mbuluar një pjesë të mirë të investimeve. Kështu, mund të shkojmë ose jo në parlament për buxhetin, pasi ka një limit 60 përqind dhe në është e kuqe apo portokalli ngjyra, do ta shohim në shtator. Shpesh herë mua më duket portokalli. Megjithatë disiplina fiskale është shumë e rëndësishme. Në rast se sektori privat nuk ka mbështetjen e fuqishme në kreditim që duhet ta ketë, ndofta sektori publik duhet të synojë pak më shumë kredi, në mënyrë që të mbështetet rritja, e cila është kryesore. Rritja është punësim dhe punësimi është qëllim.
Lidhur me bonot, siç e keni vënë re në të gjitha ratings që kanë bërë Fitch, Stanndard&Poor’s dhe Moody’s, ne jemi të pandryshueshëm. Aty ku kemi qenë në vitin 2008, B+, jemi edhe sot, pas katër vitesh krizë të thellë në mbarë Europën. Pra, kredibiliteti ynë në tregje është i pacenueshëm. Ne nuk kemi dalë, pasi nuk kemi pasur nevojë. Ajo që po bëjmë e po ecën shkëlqyer është se duam që qytetarët shqiptarë të bëhen përfitues të bonove të thesarit. 103 zyra postare, ndofta më shumë, janë shndërruar tani edhe në zyra të ankandeve të bobove të thesarit. Në muajin qershor, blerjet nga qytetarët kanë qenë më të mëdha se tre vitet e fundit të marra sëbashku. Mendoj se kjo është shumë pozitive. Qytetarët tregohen të mençur, pasi bonot janë 100 përqind të siguruar, kanë interes më të lartë. Kështu qytetari përfiton diçka dhe paratë që ka i vë në qarkullim, nuk i mban në arkë.
Zoti Kryeministër po lidhur me reformën parlamentare, a do pranohen kërkesat e Partisë Socialiste?
Kryeministri Berisha: Të gjitha kërkesat e PS-së janë pranuar, përveçse një kërkese. Zoti rama kërkon që lideri i opozitës të sanksionohet në Kushtetutë me të njëjtën të drejtë me kryeministrin. Por këtu ka një problem. Për shembull në Shqiëpri, lideri i opozitës nuk është në parlament. Kryetari i grupit parlamentar nuk është lideri i opozitës, është kryetar i grupit parlamentar. Për arsye të kuptueshme të funksionimit të parlamentit, në raste të përsëritura kryetari i grupit është i detyruar t’i japë kohën e tij një deputeti që është ekspert i një fushe të caktuar. Por a mund të shndërrohet funksioni i kryeministrit në një funksion kaskadë, deri të thyejë të rrëzohet diku. Kjo nuk është për Sali Berishën, por për vendin. Ndaj nuk e ka këtë asnjë vend. I kam kërkuar zoti Rama që ekspertët e tij të studiojnë Kushtetuta të botës dhe nëse e gjejnë në një vend të tillë, unë jam plotësisht dakord. Shqipërojnë Britaninë, por Britania është më sistemi më i vjetër në Europë, të cilin nuk e praktikon dot asnjë vend tjetër. Ai funksion tërësisht mbi bazën e traditës dhe dihet fakti që nuk e ka të sanksionuar në Kushtetutë. Ndaj në rast se ai e gjen një vend që e ka të sanksionuar në Kushtetutë, një të drejtë të tillë, unë edhe këtë do ta pranoj. Në të kundërt, unë nuk mund të krijoj Kushtetutë sui generis, sipas llojit. Më kërkon që të ndryshojmë Kushtetutën për Gramozin, gjë të cilën nuk e kërkon vetë Gramozi. Megjithatë janë bërë lëshime të shumta.
Me arritjet e deritashme, a ka shpresë që ne të marrim një përgjigje pozitive për statusin e vendit kandidat në tetor?
Kryeministri Berisha: Lidhur me statusin ky është një proces kompleks. Është e rëndësishme që ne të bëjmë çdo përpjekje. Kërkesat janë në interesin në të mirë të shqiptarëve dhe ne po punojmë për to. Por Brukseli është një kopsht, dera e të cilit ka 28 çelësa. Ndaj e kuptoni vetë se ky është një proces jo kaq i thjeshtë.
Ju folët për një koalicion të shkëlqyer në 2013, a do të jetë partia e zotit Topi pjesë e tij?
Kryeministri Berisha: Historiku i krijimit të kësaj force është një ëndërr e Edi Ramës. Unë nuk mund t’ia marr ëndrrën Edi Ramës, se jam njeri që i respektoj ëndrrat. E dëgjuat kur tha se më dukej si byro politike, por kur ishte vetë zëvendëskryetar i byrosë politike, nuk i dukej e tillë dhe kur nuk ishte më, tha aty më dukej si byro politike. Të mos ia prekim ëndrrën Edi Ramës! T’ia lëmë siç e ka!
Nëse e kuptova mirë, ju thatë se Edi Rama është aleati juaj, pasi shkon në kahun e kundërt të asaj që ju do të donit, të jetëgjatësisë të kësaj qeverisje. Do të thotë se jeni lodhur ju nga qeverisja e do të donit të ndërronit kah me Edi Ramën?
Kryeministri Berisha: Ç’është e vërteta thashë nuk ia dua atë ndihmë. Përsa i përket lodhjes apo çlodhjes, ato janë një fenomen i përditshëm normal. Por pasioni nuk ndjen as lodhje, as çlodhje. Pasioni për atë që beson në programin që zbaton, të bën që këto të dyja t’i kesh ndry në banesën e harresës. Por them se çfarë do t’u thotë zoti Rama qytetarëve socialistë dhe atyre shqiptarë, për çështjen e imunitetit. Sigurisht, imuniteti, në radhë të parë, është i padëshirueshëm, kur atë e ka qeveria. Sigurisht, imuniteti, në radhë të parë, është shumë i padëshirueshëm për qytetarët, kur atë e ka mazhoranca. Nuk ka politikan modern e të qytetëruar që të thotë se nuk heq imunitetin, pasi është si të thotë publikisht më falni se kam pak dorë. Tha Berisha flet për këshillin e miliarderëve, por miliarderët i ka në qeveri. Atëherë përse i mban me imunitet ata në qeverinë time, si do jua shpjegosh socialistëve se po mban qeverinë me imunitet. Nëse do ta votonin, 99 përqind e qytetarëve shqiptarë, në mos më shumë, do të ishin për heqjen e imunitetit për politikanët e zyrtarët e tyre. Këto i japin pikë atij që mbështet variantin që është në interesin e qytetarëve. Unë nuk dua absolutisht ta bëj imunitetin, çështje kredibiliteti politik, por ne e pranuam atë që kërkoi: ndryshime në Kushtetutë. Ndaj sollëm në parlament draftin fjalë për fjalë e germë për germë siç e kanë prurë ekspertët e huaj. Atëherë përse duhet ta kapin me dorë, që ta shqiptarizojmë? Ajo që fiton është opozita se ka përballë një qeveri, e cila është pa imunitet. Në fund të fundit, kush i administron fondet e vendit - administrata, qeveria. Unë nuk them se opozita mund të mos abuzojë me të, por gjëja më e pakonceptueshme është të mos e votojë heqjen e tij. Besoj ju kujtohet që në vitin 2003, ne çuam në parlament projektligjin për heqjen e imunitetit, pasi na takonte ta bënim këtë se ishim në opozitë dhe nuk mund të ishim opozitë, nëse nuk bënim një veprim të tillë. Unë shpresoj shumë që opozita të ulet sëbashku me ne e ta votojmë, ashtu siç arritëm reformën zgjedhore. Ky është një ligj i mrekullueshëm. Ju lutem lexojeni edhe ju. Vetëm mbani parasysh një moment, për të mos u ngatërruar, se të gjithë imunitarët gjykohen nga Gjykata e Lartë dhe në qoftë se parlamenti kërkon t’i kundërvihet Gjykatës së Lartë, atëherë kjo është absolutisht dëshmia më flagrante e vendimit të tij për të marrë pushtetin gjyqësor. Në qoftë se parlamenti i njeh vetes të drejtën të hedhë poshtë vendime, ai bëhet gjykatës, merr pushtetin gjyqësor. Megjithatë ligji i ka dhënë të drejtën parlamentit që, nëse shihet se mund të abuzohet për ta dëmtuar politikisht funksionimin e tij, ta rikthejë. Ky është një propozim i shkëlqyer. Mendoj se nuk ka mbetur gjë në këtë ligj, as për kryeministrin, as për zotin Rama, por ka mbetur që t’i falenderojmë shumë ata që sollën këtë ekspertizë të mrekullueshme dhe ta votojmë.
Duke e mbyllur, ju falënderoj shumë për interesin që dëshmuat. Natyrisht, ju kërkoj ndjesë pasi ju ftova ditën e shtunë që është një ditë gjysmë pushimi për ju, por nuk mund të qëndroja kurrsesi pa u paraqitur para jush. Kanë ndodhur shumë ngjarje dhe unë nuk kisha mundur të përmbushja detyrimet e mia ndaj jush. Faleminderit shumë.
14/07/2012
