Këshilli i ministrave mori sot në shqyrtim dhe miratoi Projektligjin për një ndryshim në ligjin 9723,”Për qendrën Kombëtare të Regjistrimit”, të ndryshuar.

Ky projektligj synon përmirësimin e klimës së biznesit, nëpërmjet thjeshtëzimit të formalizimit të dokumentacionit të kërkuar për regjistrimin e bizneseve në Qendrën Kombëtare të Regjistrimit (QKR).

Në zbatim të porosive të dhëna për marrjen e masave për thjeshtëzimin e formalizimit të dokumentacionit të regjistrimit të bizneseve në ministri dhe institucione qendrore, ndër të tjera për regjistrimin e subjektit është pranuar që të dorëzohet dokumentacioni në origjinal, ose fotokopje të panjësuara me origjinalin, ndërkohë që në dispozitën ligjore është parashikuar detyrimi që kanë subjektet tregtare për të dorëzuar në regjistrin tregtar kopje të njehsuara me origjinalin.

Projektligji propozon ndryshimin e pikës 2, të nenit 27  të ligjit ”Për qendrën Kombëtare të regjistrimit”, e cila ndryshohet si vijon: Dokumentet shoqëruese duhet të dorëzohen në origjinal ose në kopje të panjësuara me origjinalin dhe të jenë hartuar në formën e përcaktuar nga legjislacioni përkatës apo nga dispozitat e këtij ligji.