Mbledhjen e sotme të Këshillit të Ministrave, Kryeministri Berisha ia kushtoi thellimit të procesit të decentralizimit, duke e konsideruar atë të domosdoshëm dhe jetik për funksionimin e shtetit ligjor.

“Ky është një proces i pandalshëm, i domosdoshëm dhe jetik për funksionimin e shtetit ligjor dhe demokracisë në Shqipëri. Parimi i decentralizimit është një nga parimet më thelbësore të të gjitha kushtetutave të rendit demokratik,” u shpreh Kryeministri.

Duke vlerësuar hapat e mëdha pozitivë që janë ndërmarrë në këtë drejtim, Kryeministri theksoi se qeveria është e zotuar për procesin e decentralizimi dhe, në funksion të tij, për shpejtimin e hapave të domosdoshme për ta bërë atë sa më eficent.

Kryeministri bëri të ditur se Ministria e Financave ka marrë porosi të përpunojë mundësitë e delegimit të taksave të tjera pushtetit vendor. Krahas komponentit fiskal, Kryeministri konsideroi një zhvillim të rëndësishëm edhe paraqitjen sa më shpejt në qeveri të ligjit që rregullon marrjen e kredive nga pushteti vendor.  

“Qeveritarët vendorë nuk mund të përmbushin detyrimet ndaj qytetarëve të tyre, në rast se nuk kanë të drejtë të marrin kredi. Ata nuk mund t’u përgjigjen kërkesave në rritje të qytetarëve, në rast se nuk u krijohen mundësitë për kompletimin e urbanizimit apo t’i japin përgjigje problemeve të krijuara nga ndërtimi gjatë gjithë këtyre viteve. Sikundër ata nuk mund të administrojnë sistemet e ujësjellës-kanalizimeve, në rast se nuk do të kenë financat. Ndaj ne duhet ta shpallim këtë çështje madhore të agjendës sonë,” u shpreh Kryeministri.

Krahas decentralizimit, Kryeministri tha se do të shkohet edhe drejt dekoncentrimit, duke e cilësuar këtë një proces të dytë ky shumë të rëndësishëm për funksionimin e shtetit ligjor.