Kryeministri Berisha priti sot, nё kryeministri, një grup gazetarësh të mediave më prestigjoze gjermane, të cilët kanë nisur një vizitë disaditore në Shqipëri. Në përbërje të grupit janë përfaqësues të gazetave të mirënjohura “Frankfurter Allgemeine Zeitung", “Tagesspiegel", “Märkische Allgemeine Zeitutng", “Berliner Zeitung”, gazetёs ekonomike “Handelsblatt", revistёs "Spiegel online", stacioneve televizive “West Deutsche Rundfunk" dhe “Mittel Deutscher Rundfunk", filiale të ARD-së, “Deutschland-Berlin-Brandenburg" (DBB), radios "RBB", si dhe kryetarja e Klubit të Shtypit të Berlinit dhe përfaqësues të Dhomës gjermane të Industrisë dhe Tregtisë.

Ata e informuan Kryeministrin se qëllimi i vizitës së tyre ёshtё njohja nga afër me Shqipërinë, zhvillimet dhe qasjen që qeveria e shoqëria shqiptare kanë ndaj procesit të integrimit në Bashkimin Europian. Ata i thanë Kryeministrit se me interes të veçantë prisnin zhvillimin e një turi njohës në disa qytete e site arkeologjike si Kruja, Durrësi, Berati, Saranda, Butrinti, çka do t’i japë mundësinë të njihen edhe me historinë e kulturën shqiptare.

Pasi u njoh me qëllimin e vizitës, Kryeministri Berisha i uroi mirëseardhjen dhe që qëndrimi në Shqipëri të ishte një përvojë e bukur dhe mbresëlënëse për ta.

Më pas, Kryeministri, duke iu përgjigjur interesimit të tyre, bëri një panoramë të zhvillimeve në Shqipëri. Për shoqërinë shqiptare, tha Kryeministri, nuk ka projekt më madhor për këtë shekull, se integrimi në Bashkimin Europian. “20 vjet më parë, Shqipëria ka qenë vendi më unik  në Europë, i cili nuk gëzonte thuajse as edhe një standard europian, edhe pse ekzistonte në këtë kontinent. Në vitin ’92, Shqipëria renditej vendi i tretë më i varfër në botë, sëbashku me Ugandën e Angolën. Sot, ajo i përket grupit të vendeve me të ardhura të mesme të larta, sipas Bankës Botërore dhe institucioneve të tjera financiare.” Por qeveria - theksoi Kryeministri - e konsideron këtë proces të bazuar në meritë dhe po punon me përparësi për realizimin me shpejtësi të standardeve e normave të kërkuara për anëtarësimin në BE. Në këtë kontekst, ajo që ne synojmë është zhvillimi i qëndrueshëm i vendit. Shqipëria - vend i zhvilluar është projekti, me të cilin ne synojmë të bëhemi pjesë e BE-së dhe në realizim të kësaj, gjatë këtyre viteve janë ndërmarrë një sërë reformash kyç ekonomike, fiskale dhe strukturore. Falë edhe këtyre reformave, tha Kryeministri, ekonomia shqiptare arriti t’i rezistojë krizës më të rëndë ekonomike dhe financiare që Europa e bota ka njohur.

Një tjetër aspekt i rëndësishëm, ku janë përqendruar përpjekjet e qeverisë, tha më tej Kryeministri, është edhe teknologjia e informacionit. Aplikimin e procedurave dixhitale në shërbimet publike, theksoi Kryeministri, e shohim edhe si një nga faktorët e rëndësishëm në rritjen e transparencës dhe luftën kundër korrupsionit. Shëndetësia, turizmi dhe mjedisi janë gjithashtu fusha me fokus të veçantë në programin e qeverisë. Nё vijim, Kryeministri Berisha paraqiti potencialet që Shqipëria ofron për investime.   

Duke folur mbi ecurinë e procesit integrues të vendit, Kryeministri vlerësoi normalizimin e situatës politike në vend, duke theksuar se forcat politike po bashkëpunojmë në parlament për realizimin e reformave të kërkuara në kuadër të integrimit europian.

Në vijim të bashkëbisedimit, Kryeministri iu përgjigj interesimit të gazetarëve në lidhje me çështje të ndryshme.

Në mbyllje, Kryeministri Berisha shfrytëzoi takimin me gazetarët e mediave prestigjioze gjermane, për të ftuar qytetarët gjermanë të vizitojnë Shqipërinë, duke theksuar se në këtë vend do të gjejnë jo vetëm panoramën e mrekullueshme, por edhe mikpritjen e shkëlqyer të shqiptarëve.