Kryeministri Berisha priti sot në takim Presidentin e Gjykatës Evropiane të të Drejtave te Njeriut në Strasburg, zotin Nikolas Bratza.

Kryeministri Berisha, pasi e falënderoi për vizitën dhe i uroi mirëseardhjen zotit Bratza, e njohu atë me zhvillimet në sistemin e drejtësisë në Shqipëri. Kryeministri Berisha gjithashtu, e informoi zotin Bratza se qeveria që ai drejton është e vendosur të ndërmarrë çdo reformë, e cila afron Shqipërinë me Europën dhe në këtë drejtim, Kryeministri ritheksoi edhe një herë se Shqipëria, nga vendi më i izoluar dhe me mungesa të theksuara në zbatimin e ligjit dhe respektimin e të drejtave themelore të njeriut, sot është vendi i cili “zbatimin e vendimeve gjyqësore” e ka mbi mesataren e vendeve europiane.

Kryeministri theksoi se me marrjen e Presidencës shqiptare të Komitetit të Ministrave të Këshillit të Europës, Shqipëria do të kontribuojë edhe në respektimin dhe forcimin e bashkëpunimit me Gjykatën Europiane të të Drejtave të Njeriut.

Nga ana e tij, z. Nikolas Bratza, duke falënderuar Kryeministrin për pritjen, vlerësoi zhvillimet në Shqipëri si shumë mbresëlënëse. Ai gjithashtu vlerësoi bashkëpunimin e institucioneve shqiptare, në respektim të të drejtave të njeriut dhe hapat e shpejtë me të cilat Shqipëria ka ecur drejt praktikave më të mira evropiane, në këtë drejtim.

Presidenti i Gjykatës Evropiane të të Drejtave të Njeriut në Strasburg, z.Nikolas Bratza, e ftoi Kryeministrin Berisha të vizitonte Gjykatën e Strasburgut, ftesë të cilën Kryeministri e mirëpriti me kënaqësi.