Kryeministri Berisha drejtoi sot, mbledhjen e Task Forces për Regjistrin Themelor të Tokës,  e cila ka si objekt pune ndjekjen e Implementimit të Projektit të Administrimit dhe Menaxhimit  të Tokës (LAMP), me Bankën Botërore.

Në vijim të diskutimeve mbi projektin e dixhitalizimit të regjistrit të tokës, Task Forca miratoi rregulloren për procedurat dhe kushtet për kryerjen e ndryshimeve dhe shtesave të funksioneve në regjistrin elektronik të pasurive të paluajtshme.

Gjatë mbledhjes, Kryeministri Berisha theksoi se pas regjistrit të gjendjes civile, projekti i dixhitalizimit të regjistrit të tokës është projekti më themelor, sot, në Shqipëri. “Natyrisht, - u shpreh Kryeministri - ky regjistrim është njëkohësisht edhe regjistri më i komplikuar dhe si i tillë kërkon sërish monitorimin më të rreptë dhe vëmendjen më të madhe.”

Kryeministri Berisha kërkoi shpejtimin e ritmeve të projektit te regjistrimit, duke nënvizuar se përvoja e deritanishme e bën plotësisht të mundshme  përfundimin e shpejtë të këtij procesi. Kryeministri tha se ritmi i procesit nuk duhet të cenohet nga periudha e pushimeve të administratës, në muajin gusht.

Lidhur me rregulloren e miratuar, Kryeministri Berisha e konsideroi atë të  një rëndësie kapitale, pasi “garanton paprekshmërinë dhe stabilitetin e këtij sistemi; përcakton mekanizmin ligjor të funksionimit të sistemit; përcakton rregullat bazë që do të respektohen me rigorozitet të madh nga të gjithë punonjësit; garanton transparencën e plotë të funksionimit dhe parandalon çdo ndërhyrje të pamotivuar ligjërisht në sistem.”

Në vijim, fjala e Kryeministrit në mbledhjen e Task Forces:

“Projekti i dixhitalizimit të regjistrit të tokës është projekti më themelor, sot, në Shqipëri. Pas regjistrit të gjendjes civile, regjistri i tokës është më kryesori për një vend dhe një shoqëri.

Gjatë këtyre muajve është bërë progres i rëndësishëm dhe i prekshëm, si në regjistrimin parësor të parcelave, ashtu edhe në trajtimin e materialit të regjistruar. Programi që po aplikohet në proces e sipër, paraqet problematikat që duhen adresuar si në rrafshin ligjor, të rregulloreve të qëndrimit tërësor të këtij programi dhe në raste të caktuara edhe në rrafshin teknologjik.

Grupi i punës i ngarkuar me mbikëqyrjen e funksionimit të programit dhe funksionimit të procesit në tërësi ka bërë një punë shumë të mirë, që qëndron në lartësinë e rëndësisë kapitale të këtij procesi. Natyrisht, ky regjistrim është njëkohësisht edhe regjistri më i komplikuar dhe si i tillë kërkon sërish monitorimin më të rreptë dhe vëmendjen më të madhe. Ritmet e këtij regjistrimi duhet të shpejtohen dhe është shumë normale, se këtë na e bën të mundur akumulimi i përvojës së deritanishme. Një përvojë shumë e çmuar. Ne kemi marrë një zotim që ky proces të përfundojë brenda pranverës së vitit 2013. Natyrisht, kjo kërkon shumëfishim të forcave, mobilizim të burimeve, zgjerimin dhe rritjen e kapaciteteve regjistruese dhe përpunuese. Ndaj edhe kjo mbledhje ka si qëllim kryesor një bilanc dhe përcaktimin e detyrave për muajt që vijnë.

Zoti ministër i Drejtësisë dhe zoti Kryeregjistrues i Pasurive të Paluajtshme, është normale që administrata gjatë muajit gusht do të marrë pushimet me alternim dhe njerëzisht do të kërkoja që pushimet të merren, por pa cenuar ritmin e punës së këtij procesi. Nuk mund të regjistrojmë më pak në muajin gusht, sesa në muajin korrik. Përkundrazi, duhet të bëjmë gjithçka për të qëndruar në lartësinë e muajit gusht e për ta dyfishuar në tërësi procesin në muajin shtator, tetor, nëntor e vijim.

Sot miratojmë rregulloren që ka të bëjë me përcaktimin e mënyrave, procedurave dhe kushteve për kryerjen e ndryshimeve dhe shtesave të funksioneve në regjistrin elektronik të pasurive të paluajtshme. Kjo rregullore është e një rëndësie kapitale, pasi garanton paprekshmërinë dhe stabilitetin e këtij sistemi. Ajo ka rëndësi të madhe, sepse përcakton të gjithë mekanizmin ligjor të funksionimit të sistemit, përcakton rregullat bazë, të cilat do të respektohen me rigorozitet të madh nga të gjithë punonjësit, por garanton edhe transparencën e plotë të funksionimit të sistemit dhe parandalon çdo ndërhyrjeje të pamotivuar ligjërisht në sistem. Jam i bindur se rregullorja përbën një bazë solide ligjore, për këtë veprimtari.”