Kryeministri Berisha priti sot në takim senatorin francez Bernard Fournier, Kryetar i Grupit të Miqësisë Franko – Shqiptare në Senatin francez, i cili ndodhet në Shqipëri në kuadër të një vizite private.

Kryeministri Berisha i uroi senatorit Fournier mirëseardhjen dhe kënaqësinë që e priste gjatë kësaj vizite.  Kryeministri i shprehu senatorit Fournier mirënjohjen dhe falënderimin për ndihmën dhe mbështetjen e madhe që Franca i ka dhënë Shqipërisë gjatë këtyre 20 viteve dhe, në mënyrë të veçantë senatorit Fournier për rolin e tij në forcimin e miqësisë mes dy vendeve.

Kryeministri Berisha theksoi se në 100 vjetorin e pavarësisë së Shqipërisë ajo tashmë është anëtare e NATO-s dhe Kosova është shtet i pavarur dhe se ky jubile i gjen shqiptarët të lirë, kudo që janë.

Duke i vlerësuar marrëdhëniet dypalëshe si shumë të mira, Senatori Fournier shprehu vlerësimet maksimale për transformimin e madh që ka njohur Shqipëria gjatë viteve të fundit, si dhe çmoi pasuritë natyrore dhe trashëgiminë kulturore të saj.  Ai gjithashtu vlerësoi kontributin që jep Shqipëria në kuadër të Organizatës së Frankofonisë.

Kryeministri Berisha e njohu shkurtimisht mikun francez me drejtimet e reformave që po ndërmerren nga qeveria shqiptare në edukim, shëndetësi, ekonomi, infrastrukturë etj. të cilat synojnë një Shqipëri të zhvilluar e të integruar në BE, si objektivi më madhor që qeveria dhe populli shqiptar kanë.